ଭୁବନେଶ୍ଵର: ରାଜ୍ୟ ପରିବହନ କର୍ତ୍ତୃପକ୍ଷ ପକ୍ଷରୁ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ (ଟ୍ୱିଟର) ମାଧ୍ୟମରେ ସୂଚନା ଦିଆଯାଇଛି ଯେ, ମୋଟର ଯାନ ପ୍ରଦୂଷଣ ସାର୍ଟିଫିକେଟ (PUC Certificate Odisha) ଯାଞ୍ଚ ସମ୍ବନ୍ଧରେ ଜନସାଧାରଣ ଯେଉଁ ସମସ୍ୟାର ସମ୍ମୁଖୀନ ହେଉଥିଲେ, ସେହି ପ୍ରସଙ୍ଗକୁ ଧ୍ୟାନରେ ରଖି ବୈଧ ପ୍ରଦୂଷଣ ପ୍ରମାଣପତ୍ର ବିନା ଇନ୍ଧନ ଯୋଗାଣ ନିୟମକୁ ଅସ୍ଥାୟୀ ଭାବେ ଘୁଞ୍ଚାଯାଇଛି।
ପୂର୍ବରୁ ଏହି ନିୟମ ଜାନୁଆରୀ ମାସରୁ କାର୍ଯ୍ୟକାରୀ କରିବାକୁ ନିଷ୍ପତ୍ତି ହୋଇଥିଲା। କିନ୍ତୁ ଜନସାଧାରଣଙ୍କ ଦାବି ଓ ସୁବିଧାକୁ ଦୃଷ୍ଟିରେ ରଖି ବାଣିଜ୍ୟ ଓ ପରିବହନ ବିଭାଗର ମାନ୍ୟବର ମନ୍ତ୍ରୀ ବିଭୂତି ଭୂଷଣ ଜେନାଙ୍କ ନିର୍ଦ୍ଦେଶରେ ଏହାକୁ ଫେବ୍ରୁଆରୀ ପହିଲା ପର୍ଯ୍ୟନ୍ତ ବଢ଼ାଯାଇଛି।
ଏହି ଅବଧି ମଧ୍ୟରେ ଯେଉଁ ଯାନମାନଙ୍କ ପାଖରେ ବୈଧ ପ୍ରଦୂଷଣ ପ୍ରମାଣପତ୍ର ନାହିଁ, ସେମାନେ ମୋଟର ଯାନ ଆଇନ ଅନୁଯାୟୀ ଶୀଘ୍ର ପ୍ରଦୂଷଣ ଯାଞ୍ଚ କରାଇନେବାକୁ ପରିବହନ ବିଭାଗ ପକ୍ଷରୁ ଅନୁରୋଧ କରାଯାଇଛି। ସମୟ ସୀମା ବୃଦ୍ଧି କରାଯାଇଥିବାରୁ ଲୋକେ ବିବ୍ରତ ନ ହୋଇ ସହଜରେ ଯାଞ୍ଚ କରାଇପାରିବେ ବୋଲି ବିଭାଗ ଆଶା ପ୍ରକାଶ କରିଛି।
ପରିବହନ ବିଭାଗ ସ୍ପଷ୍ଟ କରିଛି ଯେ, ଫେବ୍ରୁଆରୀ ୧ ପୂର୍ବରୁ କୌଣସି ପେଟ୍ରୋଲ ପମ୍ପରେ ପ୍ରଦୂଷଣ ପ୍ରମାଣପତ୍ର ନଥିବା କାରଣରୁ କାହାକୁ ମଧ୍ୟ ଇନ୍ଧନ ଦେବାରୁ ବଞ୍ଚିତ କରାଯିବ ନାହିଁ। ଏହି ମଧ୍ୟବର୍ତ୍ତୀ ସମୟରେ ପ୍ରଦୂଷଣ ପ୍ରମାଣପତ୍ରର ଗୁରୁତ୍ୱ ସମ୍ବନ୍ଧରେ ବ୍ୟାପକ ସଚେତନତା କାର୍ଯ୍ୟକ୍ରମ ଗ୍ରହଣ କରାଯିବାକୁ ମଧ୍ୟ ନିଷ୍ପତ୍ତି ହୋଇଛି।
ପରିବହନ କ୍ଷେତ୍ରରେ ପରିବେଶ ସୁରକ୍ଷାକୁ ସର୍ବାଧିକ ପ୍ରାଧାନ୍ୟ ଦେବାକୁ ବିଭାଗ ଆହ୍ୱାନ କରିଛି। ପ୍ରଦୂଷଣ ସୃଷ୍ଟି କରୁଥିବା ଯାନ ବ୍ୟବହାର ନ କରିବା ସହ ନିୟମିତ ସମୟାନ୍ତରରେ ଗାଡ଼ିର ପ୍ରଦୂଷଣ ଯାଞ୍ଚ କରି ବୈଧ ପ୍ରମାଣପତ୍ର (PUC Certificate Odisha) ରଖିବାକୁ ଯାନ ମାଲିକମାନଙ୍କୁ ପରାମର୍ଶ ଦିଆଯାଇଛି।
ପରିବହନ ବିଭାଗ ଦ୍ୱାରା ମାନ୍ୟତାପ୍ରାପ୍ତ ପ୍ରଦୂଷଣ ଯାଞ୍ଚ କେନ୍ଦ୍ରରେ ଯାଞ୍ଚ କରାଇବା ସହ, ଯାଞ୍ଚ ପରେ VAHAN ପୋର୍ଟାଲରେ ପ୍ରଦୂଷଣ ପ୍ରମାଣପତ୍ରର ବୈଧତା ଅପଡେଟ୍ ହୋଇଛି କି ନାହିଁ, ତାହା ନିଶ୍ଚିତ କରିନେବାକୁ ମଧ୍ୟ ଯାନ ମାଲିକଙ୍କୁ ଅନୁରୋଧ କରାଯାଇଛି।
